Дні Віцебскай вобласці на ВДНГ у Маскве

Сёння ў рамках міжнароднай выставы-форуму «Расія», якая праходзіць на пляцоўцы ВДНГ у Маскве, стартуюць Дні Віцебскай вобласці.

Тэматычная экспазіцыя рэгіёну разгарнулася ў беларускім нацыянальным павільёне і змяніла прэзентацыю Брэсцкай вобласці. Цягам трох з паловай тыдняў (да 26 лютага) жыхары і госці расійскай сталіцы змогуць пазнаёміцца з прамысловым, турыстычным і культурным патэнцыялам паўночнага рэгіёну Беларусі. Праграма Дзён Віцебшчыны будзе насычанай, крэатыўнай і будзе складацца з некалькіх раздзелаў. Запланаваны дэгустацыі прадукцыі прамысловых прадпрыемстваў, прэзентацыі турыстычных магчымасцей вобласці, канцэрты, інтэрактывы і майстар-класы народных мастацкіх рамёстваў – гравюры, саломапляцення, ткацтва.

Беларускі каларыт пакажуць народныя фальклорныя творчыя калектывы. Асобнае месца на выставе зойме прэзентацыя брэнда Віцебска і Беларусі – пляцоўка Міжнароднага фестывалю мастацтваў «Славянскі базар». Каб адчуць атмасферу маштабнага форуму, які штогод аб'ядноўвае тысячы гасцей, дастаткова наведаць беларускі павільён на ВДНГ у перыяд з 15 па 26 лютага.

Галоўнае мерапрыемства Дзён Віцебскай вобласці на выставе-форуме «Расія» адбудзецца 16 лютага. Плануецца, што беларускі павільён у гэты дзень наведаюць высокія госці – прадстаўнікі дзяржаўных органаў і адміністрацый рэгіёнаў Расійскай Федэрацыі, афіцыйныя асобы Рэспублікі Беларусь. Адбудуцца прэзентацыі патэнцыялу Віцебшчыны ў сферы прамысловай вытворчасці і аказання паслуг, турыстычных магчымасцей і культурна-гістарычных традыцый рэгіёну.