Узбекска-Беларускі бізнес-форум

У Самаркандзе адбыўся Узбекска-Беларускі бізнес-форум, арганізаваны Гандлёва-прамысловай палатай Рэспублікі Узбекістан і Беларускай гандлёва-прамысловай палатай у рамках правядзення 10-га сумеснага пасяджэння Міжурадавай камісіі па супрацоўніцтве паміж Рэспублікай Беларусь і Рэспублікай Узбекістан.

У форуме прынялі ўдзел больш за 60 прадстаўнікоў ад беларускага боку, у тым ліку кіраўнікі міністэрстваў і канцэрнаў, прадстаўнікі больш за 40 прадпрыемстваў са сфер прамысловай вытворчасці, машынабудавання, лёгкай і харчовай прамысловасці, дрэваапрацоўкі, фармацэўтыкі, ветэрынарыі, аптовага гандлю.

З узбекскага боку ў мерапрыемстве ўдзельнічалі больш за 250 прадстаўнікоў дзяржаўных органаў і бізнес-колаў.

Прадстаўнікі дзелавой супольнасці дзвюх краін яшчэ да пачатку форуму мелі магчымасць правесці В2В-перагаворы і абмеркаваць канкрэтныя напрацоўкі і праекты далейшага ўзаемавыгаднага партнёрства.

Форум адкрылі прывітальныя выступленні старшыні Гандлёва-прамысловай палаты Рэспублікі Узбекістан Даўрона Вахабава, старшыні Беларускай гандлёва-прамысловай палаты Міхаіла Мятлікава, намесніка хокіма Самаркандскай вобласці Ойбека Хамраева, першага намесніка старшыні Мінгарвыканкама Надзеі Лазарэвіч.

Спікеры падкрэслілі вялікую цікавасць беларускага бізнесу і бізнесу Узбекістана да ўзаемнага супрацоўніцтва – і не толькі з пункту гледжання гандлю, але і выхаду на сумесныя кааперацыйныя праекты, а таксама гатоўнасць ГПП арганізоўваць пляцоўкі ў абедзвюх краінах для асабістых сустрэч дзелавых колаў, пошуку партнёраў.

У прыватнасці, старшыня БелГПП расказаў аб дасягнутай дамоўленасці аб правядзенні ў пачатку наступнага года сустрэчы з узбекскім бізнесам у Мінску, з падпісаннем шэрага кантрактаў па тых напрамках і напрацоўках, якія сёння бачацца перспектыўнымі. Ён запрасіў прадпрыемствы абедзвюх краін прыняць удзел у гэтым мерапрыемстве.

Ацэньваючы цікавасць бізнесу, Міхаіл Мятлікаў адзначыў, што ён не толькі ў двухбаковым узаемадзеянні. Прыцягвае выхад на рынкі трэціх краін праз Узбекістан, дзе шырока прадстаўлена прадукцыя беларускай дрэваапрацоўкі, машынабудавання, лёгкай прамысловасці. Прычым маюцца на ўвазе пастаўкі як гатовай прадукцыі, так і прамежкавай групы тавараў, сыравіны – у тым ліку праз адкрыццё аптовага лагістычнага цэнтра Узбекістана ў Беларусі.

Як адзначыў кіраўнік ГПП Узбекістана Даўрон Вахабаў, у краіне працуе 186 прадпрыемстваў з удзелам беларускага капіталу, аднак ёсць усе перадумовы для павелічэння гэтай лічбы. «Мы зацікаўлены ў павелічэнні колькасці сумесных прадпрыемстваў. Сёння на форум прыехалі больш за 250 прадстаўнікоў з усіх рэгіёнаў Узбекістана, і гэта сведчыць аб зацікаўленасці дзелавой супольнасці ў развіцці супрацоўніцтва з Беларуссю», – сказаў ён.

Форум прадоўжылі выступленні першага намесніка Міністра прамысловасці Рэспублікі Беларусь Аляксандра Агароднікава, кіраўнікоў узбекскіх асацыяцый «Узэлтэхсанаат» і «Узтэкстыльпрам», прадстаўнікоў кіраўніцтва банкаў і арганізацый дзвюх краін, якія прадставілі перспектыўныя праекты развіцця двухбаковага гандлёва-эканамічнага і інвестыцыйнага супрацоўніцтва ў сферах прыборабудавання, тэкстыльнай прамысловасці, жывёлагадоўлі і ветэрынарыі, механізмы пастаўкі ва Узбекістан беларускай сельгастэхнікі ў выглядзе комплекснага тэхналагічнага рашэння з выкарыстаннем розных фінансавых інструментаў, а таксама асаблівасці ажыццяўлення ўзаемаразлікаў паміж суб'ектамі гаспадарання Рэспублікі Беларусь і Рэспублікі Узбекістан.

Вынікі Узбекска-Беларускага бізнес-форуму яго ўдзельнікі падвялі ў прысутнасці высокіх гасцей – Прэм'ер-міністра Рэспублікі Узбекістан Абдулы Арыпава і Прэм'ер-міністра Рэспублікі Беларусь Рамана Галоўчанкі.

«Узбекістан для нас з'яўляецца адным з асноўных гандлёвых партнёраў у Цэнтральнай Азіі і СНД», – адзначыў Раман Галоўчанка на сустрэчы з бізнес-коламі, падкрэсліўшы, што дыялог Беларусі і Узбекістана – бліскучы прыклад таго, як могуць развівацца адносіны паміж дзяржавамі.

«Гэтаму садзейнічае ў тым ліку сфарміраваная структура кааперацыйных сувязей. Мы не канкурэнты адна адной, эканомікі нашых краін з'яўляюцца ўзаемадапаўняльнымі», – сказаў Прэм'ер-міністр.

Ён акцэнтаваў увагу, што за апошнія тры гады тавараабарот паміж нашымі краінамі павялічыўся амаль удвая, дасягнуўшы больш за паўмільярда долараў. Пры гэтым, адзначыў кіраўнік беларускага Урада, прыкметна нацэленасць бакоў выкарыстоўваць у поўнай меры існуючы вытворчы, навукова-тэхнічны, інавацыйны патэнцыял нашых краін і ставіць «амбіцыйныя задачы па павелічэнню тавараабароту да аднаго мільярда долараў».