Удзел прадстаўнікоў БелГПП у III Міжнародным сімпозіуме кандытараў у Мінску

У Мінску 23–24 мая праходзіць III Міжнародны сімпозіум кандытараў FOOD PROM CONFECTIONERY 2024. Форум аб'яднаў каля 300 дырэктараў вядучых кандытарскіх прадпрыемстваў Беларусі, прадстаўнікоў бізнес-колаў і ключавых кандытарскіх фабрык краін ЕАЭС, работнікаў навуковай супольнасці, пастаўшчыкоў сыравіны, абсталявання, маркетолагаў, супрацоўнікаў гандлёвых арганізацый.

Мадэратарам адной з сесій сімпозіума – «Экспарт кандытарскай прадукцыі. Эфектыўныя каналы продажаў» – выступіў намеснік старшыні Беларускай гандлёва-прамысловай палаты Дзяніс Мялешкін.

Адкрываючы работу сесіі, ён адзначыў значнасць і актуальнасць яе тэматыкі, паколькі экспарт кандытарскай прадукцыі – гэта не проста эканамічная аперацыя, а магчымасць дарыць радасць і дабро спажыўцам у розных кутках зямнога шара. «Сёння кандытарская галіна – адна з галін харчовай прамысловасці, якія найбольш актыўна развіваюцца і мадэрнізуюцца. Пры гэтым трэць вырабленай у Беларусі кандытарскай прадукцыі ідзе на экспарт у больш за 50 краін: ад нашых суседзяў да Новай Зеландыі і Афрыкі, – расказаў Дзяніс Мялешкін. – Разам з тым беларускія прадпрыемствы не спыняюцца на дасягнутым, а будуюць планы якаснага і колькаснага павелічэння экспарту. Спадзяюся, што выступы спікераў – прадстаўнікоў інстытутаў падтрымкі экспарту, рэальнага сектара эканомікі, экспертаў у сферы эканамічнай дзейнасці – будуць сапраўды карысныя для ўсіх удзельнікаў».

Парадак дня сесіі ўключаў шырокі спектр пытанняў: ад прасоўвання экспарту ў розныя рэгіёны свету да спецыфікі трэндаў у сферы ўпакоўкі прысмакаў.

Юрыдычныя аспекты экспартнай дзейнасці з практычнымі прыкладамі з кандытарскай галіны прадставіў удзельнікам начальнік дэпартамента прававога забеспячэння і лічбавых тэхналогій БелГПП Віталь Вабішчэвіч, які выступіў падчас сесіі па тэме «Прававая падтрымка знешнеэканамічных кантрактаў».