Беларуска-Казахстанскі інвестыцыйны анлайн-форум

Пасольствам Рэспублікі Казахстан у Рэспубліцы Беларусь сумесна з Беларускай гандлёва-прамысловай палатай арганізаваны Беларуска-Казахстанскі інвестыцыйны анлайн-форум.

У мерапрыемстве прынялі ўдзел старшыня БелГПП Уладзімір Улаховіч, Надзвычайны і Паўнамоцны Пасол Казахстана ў Беларусі Аскар Бейсенбаеў, в.а. старшыні Камітэта па інвестыцыях Міністэрства замежных спраў Рэспублікі Казахстан Ардак Зебешаў, намеснік старшыні Праўлення АТ “Нацыянальная кампанія KAZAKH INVEST” Жандос Тэміргалі, прадстаўнікі Міністэрства індустрыі і інфраструктурнага развіцця Рэспублікі Казахстан, канцэрна “Беллеспаперапрам”, адміністрацый рэгіёнаў Беларусі і Казахстана, Міжнароднага фінансавага цэнтра “Астана”, больш за 50 беларускіх і 40 казахстанскіх прадпрыемстваў і арганізацый.

Падчас форуму разгледжаны магчымасці развіцця інвестыцыйнага і гандлёва-эканамічнага супрацоўніцтва Беларусі і Казахстана, меры падтрымкі інвестараў і перавагі вядзення бізнесу ў рамках прэферэнцыйных рэжымаў дзвюх краін, рэалізуемыя і перспектыўныя інвестыцыйныя праекты Беларусі і Казахстана, у тым ліку на ўзроўні рэгіёнаў, патэнцыял дрэваапрацоўчай прамысловасці Беларусі, фінансавыя інструменты падтрымкі інвестыцыйнай дзейнасці.

Удзельнікі адзначылі, што Беларусь і Казахстан звязваюць даўнія партнёрскія сувязі, краіны паспяхова супрацоўнічаюць у прамысловасці, аграпрамысловым комплексе, вытворчым сектары. Нягледзячы на тое, што летась па аб’ектыўных прычынах назіралася зніжэнне двухбаковага тавараабароту, па выніках чатырох месяцаў бягучага года назіраецца станоўчая дынаміка ўзаемнага гандлю. У Казахстане паспяхова працуюць сем сумесных прадпрыемстваў па зборцы прамысловай і сельскагаспадарчай тэхнікі, існуе значны патэнцыял і пэўныя напрацоўкі па развіцці інвестыцыйнага ўзаемадзеяння ў галіне інфармацыйных тэхналогій, будаўніцтве, сельскай гаспадарцы, фармацэўтыцы, іншых сферах.

“У анлайн-форуме бяруць удзел прадстаўнікі прадпрыемстваў самых розных галін. Гэта кажа пра імкненне бізнесу не толькі развіваць традыцыйныя сферы ўзаемадзеяння, але і адкрываць новыя напрамкі для паспяховага супрацоўніцтва на карысць дзвюх дзяржаў”, – адзначыў старшыня БелГПП Уладзімір Улаховіч.