Дзелавы форум «Прамысловы дыялог: Расія – Беларусь»

11 ліпеня ў Екацярынбургу ў рамках міжнароднай выставы ІНАПРАМ адбыўся дзелавы форум «Прамысловы дыялог: Расія – Беларусь». Арганізатарамі мерапрыемства выступілі міністэрствы прамысловасці дзвюх краін.                   

У пленарным пасяджэнні форуму прынялі ўдзел Намеснік Прэм'ер-міністра Рэспублікі Беларусь Пётр Пархомчык, Намеснік Старшыні Урада – Міністр прамысловасці і гандлю Расійскай Федэрацыі Дзяніс Мантураў, Дзяржаўны сакратар Саюзнай дзяржавы Расіі і Беларусі Дзмітрый Мезенцаў, а таксама генеральныя дырэктары шэрага беларускіх прадпрыемстваў. Мадэратарамі пленарнага пасяджэння выступілі кіраўнікі гандлёва-прамысловых палат Беларусі і Расіі Міхаіл Мятлікаў і Сяргей Катырын.

У рамках дзелавога форуму адбылася ўрачыстая цырымонія падпісання чатырох дакументаў. Гэта пагадненне паміж урадамі Рэспублікі Беларусь і Расійскай Федэрацыі аб супрацоўніцтве ў галіне развіцця станкаінструментальнай прамысловасці, пагадненне паміж ААТ «БЕЛАЗ» – кіруючая кампанія холдынгу «БЕЛАЗ-Холдынг» і АТ «Расійскі экспартны цэнтр» аб узаемаразуменні і супрацоўніцтве і пагадненне паміж Беларускай гандлёва-прамысловай. палатай і АТ «Расійскі экспартны цэнтр» аб супрацоўніцтве. Яшчэ адзін значны дакумент, падпісаны па выніках форуму ў Екацярынбурзе, – комплексная міжведамасная праграма ў галіне авіябудавання.

Як адзначыў Пётр Пархомчык, паміж Рэспублікай Беларусь і Расійскай Федэрацыяй даўно ўстаноўлены асаблівыя адносіны стратэгічнага партнёрства. «Пляцоўка ІНАПРАМА – яшчэ адна магчымасць падвесці вынікі, абмеркаваць актуальныя праблемы развіцця прамысловасці, знайсці новых партнёраў, падпісаць важныя кантракты і іншыя дакументы», – падкрэсліў віцэ-прэм'ер.